На 14ти Март организиравме настан за презентација на финални документи поврзани со заштита и зачувување на менталното здравје кај деца и адолесценти во Р. Северна Македонија. Документите опфаќаат: Компаративна анализа на националното законодавството за заштита на децата поврзано со ментално здравје и психосоциајлна поддршка, споредено со меѓународни и ЕУ стандарди, Анализа на јазовите во услугите, капацитетите и потребите за ментално здравје и психосоцијална поддршка на децата во системот за детска и социјална заштита, вклучувајќи услуги за деца во ризик, семејства/негуватели и професионалци, и Патоказ за развој на услугите и капацитетите на системот за детска и социјална заштита.
Сите три документи се однесуваат на системот на социјална и детска заштита, и содржат наоди и препораки за тоа што постои и е достапно во Северна Македонија, а се однесува на менталното здравје на деца и адолесценти. Клучен документ е патоказот кој содржи конкретни чекори за следните 5 години наменети за сите чинители во системот, пред сè Министерството за труд и социјална политика, како и Министерството за здравство, Министерството за образование и наука, Министерството за правда, локалната самоуправа, како и граѓанскиот сектор.
Документите ги презентираа националните експертки Елена Димушевска, Неда Чаловска Димоска и Ана Попризова, а свое обраќање имаше и претставничката на УНИЦЕФ во Северна Македонија, Патриција ДиЏовани.
Патоказот беше поздравен од многубројните претставници на институциите и граѓанските организации, кои дополнително дадоа свој придонес во креирање и унапредување на документот.
Голема благодарност до сите учесници во овој процес, а особено Канцеларијата на УНИЦЕФ за целосната поддршка на овој проект.
