Во рамките на процесот на субгрантирање на локални женски организации, нашата членка Скај Плус од Струмица организираше работна средба Советот на Општина Струмица и Комисијата за еднакви можности, на која беа презентирани наодите и препораките од анализата за Потребните на жени жртви на насилство во Струмица. Средбата се одржа во декември 2021г. во рамките на кампањата 16 дена активизам.
Учесниците на работната средба поблиску се запознаа со фактичката состојба со родово базирано и семејно насилство во Струмица и околните населени места, како и со конкретните потреби на жените по напуштање на насилната средина. Исто така, се запознаа и со обврските на локалната самоуправа во воспоставување и одржување на локални услуги за реинтеграција и заштита на жени жртви на насилство.
Претставниците на Советот и комисијата за еднакви можности ја потврдија својата заложба за унапредување на состојбата со насилство на локално ниво, и изјавија дека ќе обезбедат финансиска поддршка за домување на жени жртви на насилство по напуштање на засолниште, како и поддршка за советувалиште за жени и деца жртви на насилство. Дополнително, Општина Струмица продолжува со финансиска поддршка на засолништето за жени и деца жртви на насилство како и претходната година.
Оваа активност се спроведе во рамките на проектот „Институционализирање на квалитетни услуги за рехабилитација и интеграција на жртви од насилство“ поддржан од Австриската Агенција за развој (АДА).
