Отворен првиот Советувалишен центар за помош и поддршка на жени и деца жртви на семејно и родово базирано насилство во Битола
Денеска во Битола го отворивме првиот советувалишен центар за помош и поддршка на жени и деца кои се справуваат со родово базирано и семејно насилство – Женски Центар за поддршка Битола. Центарот е отворен со финансиска поддршка на општина Битола која од својот буџет одвои 1.000.000 денари за период од една година. Ова е првото специјализирано советувалиште за жени и деца жртви на насилство во Пелагонискиот регион кое обезбедува услуги за кориснички од општина Битола и околните општини.
Советувалишниот центар обезбедува бесплатни и доверливи услуги за помош и поддршка на жени и деца кои се справуваат со било која форма на родово базирано и семејно насилство, без разлика дали насилството се случува во моментот кога жената бара помош, или пак се случило во минатото, но оставило последици и предизвици со кои жената тековно се справува.
Центарот обезбедува советување за остварување на социјални права, психолошко советување и психотерапија, правна помош и поддршка, упатување и придружување до институции за пријавување на преживеаното насилство, како и кариерно советување и менторска поддршка за економско јакнење.
Работното време на советувалишниот центар е 08.00ч. до 16.00ч. секој работен ден.
Контакт: 075/ 393-626 и на zenskicentarbitola@gmail.com.
Работата на советувалиштето може да ја следите на ФБ профилот на Женски Центар за поддршка-Битола.
Советувалиштето го носи називот „Женски центар за поддршка – Битола“ и е четврти ваков центар со кој раководи Националната мрежа против насилство врз жени и семејно насилство, откако во 2021г. беа отворени Женските центри во Скопје и Тетово, и во септември 2022 во Кавадарци.
Повеќе информации за Женските центри за поддршка се достапни на овој линк.
