Реинтеграцијата и рехабилитацијата ана жени жртви на насилство кои ја напуштиле насилната средина е клучен процес кој го комплетира систем на заштита од родово базирано и семејно насилство. Имено, откако на жената и е пружена помош и заштита и е обезбедена нејзината безбедност, таа може потоа да реинтегрира и рехабилитира во сите општествени процеси каде целосно ќе закрепне и ќе стане независна. Ова значи дека таа ќе има обезбедено безбедно и трајно живеалиште, како и стабилно и приходно вработување за себе и своите деца.
Во голема мера, економската зависност и немањето можност за живеалиште влијаат на одлуката за напуштање на насилникот. Жената која трпи насилство е финансиски зависна од сторителот на насилството, и не може да донесе одлука да го напушти бидејќи ќе значи потенцијална сиромаштија и бездомништво за неа и нејзините деца.
Реинтеграцијата и рехабилитацијата се процесите кои овозможуваат полесно да се донесе одлуката за напуштање, но и да се обезбедат дом и вработување, како и опоравување од преживеаното насилство. Конечната цел на реинтеграцијата е живот без ризик од идно насилство, и без ризик од сиромаштија и бездомништво.
Со цел подобро запознавање со процесот на реинтеграција и рехабилитација, како и предлог Моделот за реинтеграција, изготвивме информативна и едукативна брошура која содржи детални информации за овие процеси.
Брошурата е намената за професионалци и даватели на услуги кои работаат со жени жртви на родово базирано и семејно насилство, како и за донесувачи на одлуки кои се одговорни за креирање на политики и закони поврзани со насилство врз жени.
Брошурата е достапна на овој линк.
