На 14 декември 20220г. во Кабинетот на претседателот на Република Северна Македонија под покровителство на сопругата на претседателот, Елизабета Ѓоргиевска денеска се одржа настан под наслов „Здружени против родово базирано насилство“, чија цел беше поддршка на Националната мрежа против насилство врз жените и семејно насилство. На настанот се обрати сопругата на претседателот, Елизабета Ѓоргиевска, а за работата и предизвиците со кои се соочува Националната мрежа, презентација одржа Елена Димушевска, извршна директорка на Националната мрежа против насилство врз жените и семејно насилство. За услугите коишто се обезбедуваат во Женските центри за поддршка во Скопје и Тетово, зборуваа социјалната работничка Бојана Лазаревска и психологот Небахат Имери.
Покрај претставници од Националната мрежа, на настанот присуствуваа претставници од дипломатскиот кор, канцеларијата на Обединетите Нации, граѓанскиот сектор во земјава, како и претставници на бизнис заедницата и општествено одговорни компании.
Г-а Елизабета Ѓоргиевска истакна дека на женските центри за поддршка раководени од Националната мрежа против насилство врз жени и семејно насилство, кои нудат специјализирани услуги за жртвите, им е неопходна финансиска одржливост на подолг рок, бидејќи нивното функционирање е од исклучителна важност за целокупниот систем на заштита од родово базирано насилство во нашето општество. Поради тоа, целта на настанот беше, пред сè да се даде поттик за поддршка на услугите за жените жртви за се осигури одржлива помош и поддршка во борбата против родово базирано насилство.
