Во рамките на процесот за мониторинг на спроведувањето на НАП-от за имплементација на Истанбулската конвенција, Националната мрежа направи 3 периодични мониторинг извештаи и 1 сумарен. Имено, 3-те извештаи се однесуваат на периодот од октомври 2018г. до октомври 2020г., потоа ноември 2020г. до мај 2021г., и јуни 2021г. заклучно со декември 2021г. Сумарниот извештај ги опфаќа овие 3 периодични извештаи и го дополнува периодот од јануари 2022г. до октомври 2023г., кога и заврши предвидениот рок за имплементација на НАП-от.
Целта на сумарниот извештај е да го оцени спроведувањето на предвидените активностите и исполнување на индикаторите утврдени во НАП-от, следејќи ја нивната 5-годишна имплементација. Од истражувањето и анализата во овој процес, може да се заклучи дека институциите кои се задолжени за имплементација на НАП, не се доволно транспарентни во спроведувањето на активностите – не сите министерства ги вклучуваат граѓанските организации при спроведувањето на активностите.
Највидливи резултати има во носењето на новите закони како и измените и дополнувања на некој од постоечките. Сепак и во постигнувањето на оваа ЦЕЛ 1 многу важни закони како Законот за родова еднаквост, Законот за работни односи, законот за семејство итн. остануваат непроменети. Загрижувачки слаба имплементација се забележува на активностите кои имаат за цел превенција од насилство врз жени и семејно насилство (ЦЕЛ 3 од НАП). Дополнително, потребно е во оперативните планови на надлежните министерства/институции да се предвиди и буџет за имплементација на активностите кој што повеќето институции не го предвиделе. Конечно, потребно е да се воспостави ефективен механизам за за усогласување со препораките од Истанбулската конвенција (формирање посебно експертско тело) е од клучна важност за унапредување на системот на спречување и заштита од родово базирано насилство. Оваа задача, согласно закон е доверена на Националното координативно тело, но наодите покажаа дека не е исполнета и телото се соочува со големи предизвици во неговото (не)функционирање.
МТСП започна процес на подготовка на Национална Стратегија за превенција и заштита од родово базирано и семејно насилство (2024-2032) која активност е во согласност со членовите 13 и 16 од Законот за спречување и заштита од насилство врз жените и семејно насилство. За оваа стратегија да може да се спроведе, државата мора да ги научи грешките од претходните 5 години, односно да предвиди финансиски средства во рамките на буџетите на сите релевантни институции да можат да ги спроведат активностите. Алоцираните финансиски средства за Стратегијата да бидат посебно издвоени, во посебни буџетски ставки за да полесно се следи трошењето и намената на истите.
Сумарниот извештај е достапен на овој линк.
