На 30 ноември, во хотел ,,Интернационал” во општина Велес, се оддржа панел дискусија организирана од Организација на жени на општина Велес и Националната мрежа против насилство врз жени и семејно насилство. Поканети беа претставници на Советот на општината, претставници на Комисијата за еднакви можности на мажите и жените, претставници од општина Градско, како и претставници од центарот за социјална работа, СВР Велес, подрачната канцеларија на Министерството за правда, и претставници од средните училишта Коле Неделковски и Димитрија Чуповски.
Фокусот на дискусијата беше на стандардите и нормативите кои ги налага Истанбулската Конвенција во насока на подобри услуги за помош и поддршка на жените жртви на родово базирано и семејно насилство. Дополнително се разговараше за моменталната состојба со специјализираните сервиси, односно како да се унапреди пристапноста и обезбедување на квалитетна, соодветна и навремена помош и поддршка на сите оние на кои им е потребна, независно дали живеат во Велес или во околните општини во Вардарскиот плански регион.
На панелот беа споделени и законските обврски кои единиците на локалната самоуправа ги имаат во согласност со новиот Законот за спречување и заштита од насилство врз жените и семејно насилство кој стапи на сила во Мај, 2021 година.
Оваа активност се спроведува во рамките на проектот „На пат кон ЕУ: Спречување на насилството врз жените во Република Северна Македонија“, финансиски поддржан од Фондацијата „Kvinna till Kvinna“ (The Kvinna till Kvina Fondation), а имплементиран од Националната мрежа против насилство врз жени и семејно насилство.
