Националната мрежа против насилство врз жените и семејно насилство објавува јавен повик за ангажирање експерт/ка кој/која ќе ја подготви новата Стратешка рамка за периодот 2026–2030. Овој процес е дел од нашите континуирани напори за унапредување на системскиот одговор кон насилството врз жените и семејното насилство и за обезбедување одржливи, квалитетни и достапни специјализирани услуги.
Ангажманот ќе се реализира преку партиципативен процес со организациите членки и тимот на Мрежата, со цел да се развие практична и применлива рамка која ќе ги дефинира стратешките приоритети, резултати и насоки за развој во следните четири години.
Што опфаќа ангажманот?
Експертот/ката ќе работи на анализа на релевантни документи, консултации со тимот и Управниот одбор, подготовка на нацрт-верзии, фасилитација на дводневна стратешка работилница и финализирање на документот. Ангажманот опфаќа 12 работни дена во периодот од 1 август до 15 октомври 2026 година.
Кој може да аплицира?
Потребни се релевантно високо образование, најмалку пет години искуство во стратешко планирање и организациски развој, докажано искуство во подготовка на стратешки документи и силни аналитички, комуникациски и фасилитаторски вештини. Познавање на областа на женските права и родовата еднаквост се смета за значителна предност.
Надоместок и рок за пријавување
Надоместокот изнесува 200 евра бруто по работен ден, во денарска противвредност. Рок за пријавување: 29 јули 2026 година, до 23:59 часот.
Пријавите се доставуваат на: coordinator@glasprotivnasilstvo.org.mk Предмет: „Пријава – експерт/ка за Стратешка рамка 2026–2030“
Потребни документи:
- CV
- Листа на најмалку две релевантни референци
- Пример или линк од претходно подготвена стратегија/рамка
Целиот јавен повик можете да го најдете тука.
