Во текот на Декември, веднаш по настанот за презентацијата на придонесот кон Извештаи за УПП за делот насилство врз жени и деца, ја одржавме првата средба со граѓански организации каде се презентираа наодите од извештајот, но и се дискутираа заеднички чекори за адресирање на детектираните предизвици. Имено, тимот на Националната мрежа учествуваше во подготовка на Извештајот за Универзалниот периодичен преглед на човековите права за северна Македонија, заедно со 6 други организации, како грантисти на Институтот за европска политика – ЕПИ Скопје.
Придонесот кон овој извештај беше споделен со 17 претставници на граѓански организации на иницијалната средба, кои работат на полетот на родова еднаквост и женски права, како родово базирано и семејно насилство. Најсегнати од наодите и препораките пред сè беа организации кои обезбедуваат директни специјализирани услуги на жртви на насилство, како жени така и деца. Нивниот впечаток беше дека ваквите наоди се повторуваат во изминатите 2 до 3 го дини, и дека многу слаб напредок е направен во системот на заштита од насилство. Од нивните организациски проценки и извештаи, наодите се слични, особено во делот на воспоставување и финансирање специјализирани услуги за жени жртви на РБН и СН. Останатите организации кои работат на човекови права, најмногу родова еднаквост, истакнаа дека човековите права не се воопшто приоритет на државните институции и дека државата дава само декларативни заложби, а суштински промени не гледаме на терен. Особено во родовата еднаквост која започна да се уназадува со разгорувањето на антиродовите движења во изминатите 2 години.
Дискусијата продолжи во насока на влијанието на антиродовите движења врз родово базираното насилство и родовата еднаквост, особено законските решенија кои не се донесени од овие причини. Имено, антиродовиот наратив прави плодна почва за „нормализирање“ на насилството врз жени и непостапување на институциите со должно внимание од овие причини.
На првата средба беа договорени следни чекори и втора средба на почетокот на 2024г.
Оваа активност се спроведе со поддршка на Институт за европска политика (ЕПИ) како дел од шемата за регрантирање „Човековите права во практиката“.
