Семејното насилство во Северна Македонија често останува непријавено, а одлуката жената да се обрати во институциите е една од најтешките што може да ја донесе, истакна Елена Димушевска од Националната мрежа против насилство врз жени и семејно насилство во разговор за ТВ 24 во Студио 10.
Според неа, пријавувањето на насилството не значи крај на проблемот, туку почеток на долг процес – напуштање на домот, обезбедување средства за живот и грижа за децата. Поради економска зависност, страв и недостиг на поддршка, голем број жени се двоумат да го направат тој чекор.
Димушевска нагласува дека насилството често започнува со суптилни форми на контрола и изолација, кои тешко се препознаваат на почетокот. Дополнително, системот за заштита се соочува со сериозни предизвици – ограничени услуги за поддршка, мал број шелтер центри и долги судски постапки.
„Без силен институционален систем и вистинска поддршка за жртвите, тешко може да се очекува намалување на семејното насилство“, посочува Димушевска.
