13.10.2023: Во Битола, во присуство на новинари и локални медуими, се потпиша меморандум за соработка и финансиска поддршка на Женскиот центар за поддршка -Битола, раководен од Националната мрежа против насилство врз жени и семејно насилство. Целта е подобрување на заштитата на жени и деца жртви на родово и семејно насилство, преку поддршка на Регионалниот советувалишен центар во овој дел од државата и, да се обезбеди одржливост на центарот преку финансиска поддршка на локалната самоуправа.
Ова советувалиште првично беше воспоставено со финансиска поддршка на Општина Битола. Денес и општините Могила, Новаци, Демир Хисар и Ресен, препознавајќи ја важноста од овој вид на услуги за своите граѓанки, се приклучија во поддршката и неговата финансиска одржливост.
Советувалишниот центар е отворен во Декември 2022 година во Битола и обезбедува бесплатни и доверливи услуги за помош и поддршка на жени и деца кои се справуваат со било која форма на родово базирано и семејно насилство, без разлика дали насилството се случува во моментот кога жената бара помош, или пак се случило во минатото, но оставило последици и предизвици со кои жената тековно се справува. Центарот обезбедува советување за остварување на социјални права, психолошко советување и психотерапија, правна помош и поддршка, упатување и придружување до институции и други организации, како и кариерно советување и менторска поддршка за економско јакнење.
