На 28.11.2017 г. во хотел Парк во Скопје се одржа конференција на тема „Родово базирано насилство врз жени во спорт“, во организација на Национална мрежа против насилство врз жени и семејно насилство, ТАКТ и Агенција за млади и спорт, со поддршка на Амбасадата на САД во Македонија, а во рамки на кампањата „16 Дена активизам против насилство врз жени“. Агендата за настанот е достапна тука.
Говорници на конференцијата беа: Горан Никовски – редовен професор на Факултет за физичко образование, спорт и здравје, Силвија Митевска – параглајдеристка и Претседателка на ТАКТ, Дрита Ислами – атлетичарка, Милева Велкова – поранешна ракометарка, Ирена Андреевска – спортска новинарка во МТВ.
На конференцијата се говореше за постоењето на насилство и дискриминација во спортот, начините на справување со овие појави, потребата за справување со овој проблем и подигнување на свеста на населението за навремено препознавање и превенција на насилството врз девојчињата и жените во спортот. Главни заклучоци беа дека е потребна едукација на младите за да може да го препознаваат насилството и да ги знаат начините на кои може да реагираат доколку се подложени на некој вид на насилство.
Исто така, потребно е воспоставување на механизми кои ќе бидат специфично наменети за помош и поддршка на жените и девојчињата во спортот кои се жртви на било кој вид насилство, а како примери за тоа беа посочени неколку земји кои имаат вакви механизми, како Хрватска, Унгарија, Германија итн. Примери за добри пракси од другите земји се: постоење на лица од доверба каде жртвите на насилство ќе може да се обратат за помош, воспоставен механизам за пријавување на случаи на насилство, направен прирачник за однос помеѓу тренери и спортистки и тн.
„Родово базираното насилство во спортот е сензитивна тема за која до сега се нема разговарано во нашата јавност. Еден од главните ризици е нерамномерната распределба на моќ помеѓу спортскиот работник и спортистката. Во Македонија има потреба од едукација на младите спортистки со цел да ги препознаат првите симптоми на насилството во спортот, како да постапат во тие критични моменти и каде да се обратат. Оваа конференција има за цел да извлече главни заклучоци и препораки со цел превенција и елиминација на родово базираното насилство врз жените во спортот“. – Силвија Митевска, Претседателка на ТАКТ.
Елена Димушевска, Извршна директорка на Национална мрежа против насилство врз жени и семејно насилство: Жените спортистки се изложени на различни форми на насилство за кои во нашата држава ниту се разговара, ниту пак се препознаени или пак, е воспоставен систем за заштита на жртвите. Преку своите активности во рамки на кампањата 16 дена активизам против насилство врз жените, Националната мрежа има за цел да ги отвори овие прашања и да ги потсети релеватните институции дека имаат обврска и одговорност да ги превземат сите неоходни чекори за да им овозможат на жените безбеден и активен живот.
Конференција на оваа тема беше организирана по првпат во нашата земја, како една почетна точка за подигнување на свеста за родово базираното насилство врз жените и девојчињата во спортот и иницирање на понатамошна дискусија и реакција за подобрување на состојбата во Македонија.