На 25.09.2018, во работните простории на хотел Лирак во Тетово, се одржа работна средба со претставници од областа на социјалната заштита, кои работат во општините на Полошкиот плански регион и тимот на Националната мрежа. Со оваа работна средба се започна процесот на соработка помеѓу Националната мрежа и локалната самоуправа од Полошкиот плански регион, за воспоставување на советувалишни центри за психо-социјална помош и поддршка за жени и деца жртви на семејно насилство во Тетово и Гостивар, кои ќе го опслужуваат целиот Полошки регион.
Градоначалниците во предизборниот период, со потпишување на Јавната заложба за унапредување на заштитата на жените и децата жртви на различни форми на насилство, вклучително и семејно насилство на локално ниво, се заложија да одвојат дел од локалните буџети за унапредување/воспоставување на сервиси за жртвите на насилство.
На оваа средба учествуваа претставници од областа на социјалната заштита од: општина Тетово, општина Врапчиште, општина Јегуновце, општина Боговиње, општина Брвеница, општина Маврово и Ростуша и општина Желино.
