На 12ти Април 2023г. во Социјален клуб – Комитет во Скопје, се одржа 12-то годишно Собрание на Националната мрежа против насилство врз жени и семејно насилство.
Една од клучните теми кои се дискутираа на овогодинешното собрание беше борбата за женските права под влијание на анти-родовите движење кои земаат сè поголем замав, и како тоа се одразува на родово базираното и семејното насилство.
Присутните членки се согласија дека Мрежата мора да има силно и активно членство, за да може силно и активно да делува на полето на заштита на женските права како и заштита на жените од родово базирано и семејно насилство. За таа цел потребно е зголемување на капацитетите на Мрежата преку организирање обуки и работилници на овие теми, изготвување на стратегија за понатамошно делување и активно вклучување на сите членки во овие активности.
Собранието изгласа и прием на 3 нови членки кои во изминатиот период поднесоа барање за членство во Мрежата, а тоа се: Здружение на психолози, советувачи и психотерапевти КОРТЕКС – Тетово, Хуманитарно здружение “Мајка”-Куманово и Македонско здружение на млади правници.
Согласно агендата, беа изгласани и усвоени наративните и финансиските извештаи за 2020, 2021 и 2022година, со оглед на тоа што за 2020 и 2021 година не се одржа годишно собрание поради состојбата со КОВИД 19.
