Во рамките на кампањата 16 дена активизам против насилство врз жените во текот на ноември-декември 2018 година, Националната мрежа против насилство врз жените и семејното насилство организираше јавни дебати во партнерство со Форумите/Униите на жени на политичките партии во Македонија на тема „Важноста на женското здружување и обединување во борбата против родово засновано насилство“. Јавните дебати беа организирани во Битола (30 ноември), Свети Николе (3 декември), Струмица (4 декември), Штип (5 декември) и Куманово (6 декември).
Целта на трибините е да се претстави досегашната соработка и постигнатите успеси, како и да се разговара за идните чекори. На трибините беа презентирани и основните концепти на Истанбулската Конвенција, како и обврските на локалната самоуправа во однос на превенција од насилство и обезбедување на заштита за жените жртви.
Покрај претставничката на Националната мрежа против насилство врз жените и семејното насилство, на трибините свое обраќање имаа и претставнички на Униите и Форумите на политичките партии во градовите.
